إيكو بريس عبد الرحيم بلشقر
بلا شك أنكم كا تعرفوا هاد الناس لي فالصورة؟
هادوا العمال الناجين من كارثة الفيضانات لي وقعت 8 فبراير فطنجة… واش عارفين شنو أحوالهم؟ واش عارفين كيف عايشين دبا؟ واش عندكم شي خبار على الظروف ديالهم؟
صحيفة #إيكوبريس تلاقت هاد العشية مع البعض منهم وجابت لكم الخبر اليقين…
فالوقت لي القضية ديال الضحايا لي ماتوا الله يرحمهم معروضة على أنظار القضاء، ومول الشركة ديال الخياطة يوجد رهن الاعتقال الاحتياطي ف “ساتفيلاج”.
كاين شي ناس كانوا ياكلوا الطرف دالخبز من المعمل لي غرق بالفيضان.. ومن نهار #الاثنين_الأسود والحالة ديالهم عالم بها الله… فاش كنا كنسمعوا لهم كان ابراهيم خاه ديال مول المعمل وسط العمال كا يبكي الدموووع.. كا يقول أنا خاي فالحبس الله يكون معه… وهاد الدراوش شكون غادي يوقف معهم؟؟
من بين التصريحات لي جات فكلام البعض منهم أنهم من نهار وقعت الكارثة يعيشون الكوابيس المرعبة نتيجة هول الصدمة بعد نجاتهم من الموت المحقق على ما جاء فالأقوال ديالهم..
وأكثر من هذا.. منذ الفاجعة لم يسأل عنهم أحد لا واش عندهم باش يتعشاو ولا ما عندهومشي. قالوا: ما استفدوا لا من مواكبة نفسية.. لا من دعم اجتماعي…. باستثناء جوج باطرونيس ديال النسيج فتحوا الأبواب ديالهم لبعض العمال لي نجوا من الفاجعة…
لكن كاين حالات فيهم ما قادرينشي لحد الساعة يخدموا لظروف نفسية قاهرة.. ومع ذلك طالع عليهم سومة الكراء والفواتير ديال أمانديس.. وكاين اللي تزادلو مولود وما لقا باش يسمي الزيادة وكاين لي كا يتسلف باش يعيش ولادوا… ومع ذلك يؤكدون أنهم ما كيسعاوا على حد.. كانوا خدامين كيصوروا الطرف دالخبز من المعمل لي وقع فيه الفيضان.. لكن وقعت الكارثة لي خارج الإرادة ديالهم وغيرت المسار ديال حياتهم وتغيرت حياة عادل لي كان مشغلهم.. وتقلبت حياة عائلات لي ماتوا ولادهم رأسا على عقب..
شي واحدين فيهم صرحوا لنا أن السلطات قالت لهم سكتوا على الموضوع وراهم فعلا ساكتين.. ولكن الدقة وصلت فيهم العظام ودبا كايتسائلوا علاش سمحتوا فينا كاملين دولة ومجتمع ؟؟؟ ينتهي كلام بعض الناجين من الفاجعة لي قلبهم محروق وما عالم به غير الله.
التعليق لكم..